మొసలిని కొట్టి చంపిన గ్రామస్థులు

కర్నూలు జిల్లాలో ఘటన

పెద్దకడబూరు, న్యూస్‌టుడే: కర్నూలు జిల్లా పెద్దకడబూరు మండలం కంబళదిన్నె గ్రామ ఎస్సీ కాలనీలో సోమవారం అర్ధరాత్రి మొసలి హల్‌చల్‌ చేసింది. భయాందోళనలకు గురైన కాలనీవాసులు దానిని కొట్టి చంపారు. గ్రామానికి సమీపంలో వగరూరు జలాశయం నుంచి వాగు ద్వారా మొసలి ఆ ప్రాంతానికి చేరుకుంది. వేసవి కావడంతో కాలనీలో చాలా మంది ఇళ్ల ఎదుట నేలపై నిద్రిస్తున్నారు. అర్ధరాత్రి ఓ యువకుడు మూత్ర విసర్జనకు నిద్ర లేచి.. అక్కడే ఉన్న మొసలిని చూసి కేకలు వేశాడు. వెంటనే ఇరుగుపొరుగు వచ్చి కర్రలతో కొట్టినా పారిపోకుండా మొసలి వారిపైకి తిరగబడింది. అప్రమత్తమైన కాలనీవాసులు వెంటనే గడ్డపారలు తీసుకొచ్చి చంపేశారు. అనంతరం ఉదయం వరకు తాడుతో చెట్టుకు కట్టేశారు.