వైకాపాలో చేరకపోతే.. చంపేస్తాం

మంత్రి సోదరుడి హెచ్చరిక

ఎస్పీకి తెదేపా సర్పంచి ఫిర్యాదు

కర్నూలు, న్యూస్‌టుడే: వైకాపాలో చేరు, లేదంటే నీ ప్రాణం తీస్తామని ఆ పార్టీ నాయకుడితో పాటు అనుచరులు హెచ్చరిస్తూ.. భయభ్రాంతులకు గురిచేస్తున్నారని కర్నూలు జిల్లా ఆలూరు నియోజకవర్గం చిప్పగిరి మండలం కుందనగుర్తి గ్రామ సర్పంచి పురుషోత్తం ఆరోపించారు. కార్మికశాఖ మంత్రి సోదరుడు, ఆలూరు మార్కెట్‌ యార్డు ఛైర్మన్‌ గుమ్మనూరు నారాయణతో తనకు ప్రాణహాని ఉందని, పోలీసు రక్షణ కల్పించించాలని కోరుతూ సెల్ఫీ వీడియో, మెసేజ్‌ను కర్నూలు ఎస్పీ కృష్ణకాంత్‌కు పంపినట్లు తెలిపారు. గురువారం రాత్రి గుంతకల్లు నుంచి కుందనగుర్తికి ద్విచక్రవాహనంపై వెళ్తుండగా.. గుమ్మనూరు నారాయణ, ఆయన అనుచరులు కారులో వెంటపడ్డారని అందులో పేర్కొన్నారు. చిప్పగిరి మండలంలో తెదేపాకు అనుకూలంగా ఉన్నది నీవొక్కడివేనని, నువ్వూ వైకాపాలో చేరాలని రెండు వారాలుగా వారు ఒత్తిడి చేస్తున్నట్లు తెలిపారు. ఎస్పీకి సెల్ఫీ వీడియో, మెసేజ్‌ పంపడం నియోజకవర్గంలో చర్చనీయాంశంగా మారింది.