Krishna: ఖాతాదారుల 10.6 కిలోల బంగారంతో ఉడాయించిన ఉద్యోగిని

కంకిపాడు మణప్పురం ఫైనాన్స్‌ బ్రాంచిలో ఘటన

కంకిపాడు గ్రామీణం, న్యూస్‌టుడే: కృష్ణా జిల్లా కంకిపాడులోని మణప్పురం గోల్డ్‌లోన్‌ ఫైనాన్స్‌ బ్రాంచిలో పనిచేసే ఓ ఉద్యోగిని 10.660 కిలోల బంగారంతో ఉడాయించింది. పోలీసుల కథనం ప్రకారం.. రెడ్డివెంకట పావని ఆభరణాలు తాకట్టు పెట్టుకుని, భద్రపర్చే విభాగంలో ఈ ఏడాది ఫిబ్రవరి నుంచి పనిచేస్తోంది. బ్రాంచిలో 951 మంది ఖాతాదారులకు చెందిన 10.660 కిలోల బంగారాన్ని పావని సోమవారం రాత్రి మరో వ్యక్తితో కలిసి దొంగిలించింది. వాటి విలువ సుమారు రూ.6 కోట్లకు పైగా ఉంటుందని తేల్చారు. దీనిపై మంగళవారం కంకిపాడు పోలీసులకు ఫిర్యాదు చేశారు. బ్రాంచిలో సీసీ కెమెరాలు రెండు నెలలుగా పని చేయడం లేదని పోలీసులు గుర్తించారు. పావని, మరో వ్యక్తి కలిసి బ్యాగుతో కారులో వెళ్లినట్లుగా స్థానిక లాకు రోడ్డులోని సీసీ కెమెరా ఫుటేజీలో ఉంది. పావనికి సహకరించిన నిందితుడిని పోలీసులు అదుపులోకి తీసుకొని విచారిస్తున్నారు. బుధవారం బ్రాంచిలోని దస్త్రాలను తనిఖీ చేశారు.