Crime News: కదులుతున్న బస్సులోంచి గర్భిణిని తోసేసిన భర్త

అక్కడికక్కడే బాధితురాలి మృతి

తమిళనాడులో అమానుష ఘటన

చెన్నై (ఆర్కేనగర్‌), న్యూస్‌టుడే: గర్భంతో ఉన్న భార్యను భర్త.. కదులుతున్న బస్సులో నుంచి కిందకు తోసేయడంతో ఆమె మృతిచెందింది. ఈ అమానుష ఘటన తమిళనాడులోని దిండుక్కల్‌ జిల్లాలో చోటుచేసుకుంది. పోలీసులు తెలిపిన వివరాల మేరకు.. వెంబార్‌పట్టికి చెందిన వెళ్లమెయ్యన్‌ కుమారుడు పాండియన్‌కు, కల్‌వెలిపట్టికి చెందిన బాలమురుగన్‌ కుమార్తె వళర్మతికి (18) ఎనిమిది నెలల కిందట వివాహమైంది. వళర్మతి ప్రస్తుతం అయిదునెలల గర్భిణి. సోమవారం రాత్రి భార్యాభర్తలు కల్‌వెలిపట్టి వెళ్లేందుకు గోపాల్‌పట్టి బస్టాండులో బస్సు ఎక్కారు. ఆ సమయంలో పాండియన్‌ మద్యం మత్తులో ఉండగా.. భార్యాభర్తల మధ్య గొడవ జరిగింది. కనవాయిపట్టి సమీపంలో పాండియన్‌ భార్యను బస్సులోంచి తోసేశాడు. ఆమె అక్కడికక్కడే ప్రాణాలు కోల్పోయింది. పోలీసులు మృతదేహాన్ని ఆసుపత్రికి తరలించి, నిందితుడిని అరెస్ట్‌ చేశారు.