హోటల్‌లో భారీ అగ్నిప్రమాదం.. ఆరుగురి సజీవ దహనం

బిహార్‌లో ఘటన

పట్నా: బిహార్‌ రాజధాని పట్నాలో ఘోర అగ్నిప్రమాదం చోటుచేసుకుంది. స్థానిక రైల్వేస్టేషన్‌ సమీపంలోని ఓ హోటల్‌లో భారీ ఎత్తున మంటలు చెలరేగి ఆరుగురు సజీవ దహనమయ్యారు. మరో ఇద్దరి పరిస్థితి విషమంగా ఉన్నట్లు అధికారులు వెల్లడించారు. మృతుల్లో ముగ్గురు మహిళలు ఉన్నారు. గురువారం ఉదయం 11 గంటల సమయంలో ఈ ప్రమాదం జరిగింది. సమాచారం అందుకున్న అగ్నిమాపక సిబ్బంది వెంటనే ఘటనా స్థలానికి చేరుకుని పలువురిని రక్షించారు. క్షతగాత్రులను స్థానిక ఆస్పత్రికి తరలించారు. ప్రమాదానికి కారణం తెలియలేదని, ఘటనపై విచారణ జరుపుతున్నామని పోలీసులు తెలిపారు.