Crime News:ఆన్‌లైన్‌ ఆటల్లో అప్పులపాలై భార్యాపిల్లలను చంపి ఆత్మహత్య

ప్రైవేటు ఉద్యోగి ఘాతుకం

కాంచీపురం, చెన్నై (ఆర్కేనగర్‌), న్యూస్‌టుడే: ఆన్‌లైన్‌ గేమ్‌లకు బానిసై, పనికి వెళ్లకుండా, అప్పుల పాలైన వ్యక్తి... భార్య, ఇద్దరు పిల్లలను హత్యచేసి ఆత్మహత్యకు పాల్పడ్డారు. ఈ ఘటన చెన్నైలో ఆదివారం వెలుగు చూసింది. పోలీసుల కథనం ప్రకారం... పెరుంగుడి పెరియార్‌లోని ఓ అపార్టుమెంట్‌లో మణికంఠన్‌ (36), తార (35) దంపతులు నివసిస్తున్నారు. వీరికి కుమారులు ధరణ్‌ (10), దహాన్‌ (1) ఉన్నారు. కోయంబత్తూర్‌కు చెందిన మణికంఠన్‌ ఓ ప్రైవేటు సంస్థలో పని చేస్తున్నారు. రెండు నెలలుగా పనికి వెళ్లకుండా ఇంట్లోనే ఉంటున్నారు. ఆన్‌లైన్‌లో నగదు పెట్టి గేమ్‌లు ఆడుతూ అప్పులపాలయ్యారు. ఈ విషయమై దంపతుల మధ్య తరచూ గొడవలు జరిగేవి. డిసెంబరు 31న రాత్రి ఘర్షణపడ్డారు. ఈ క్రమంలో భార్య, ఇద్దరు పిల్లలను చంపి మణికంఠన్‌ ఆత్మహత్య చేసుకున్నారు. ఇంటి తలుపులు మూసి ఉండటాన్ని గుర్తించిన స్థానికులు అనుమానంతో ఆదివారం పోలీసులకు సమాచారం ఇచ్చారు. పోలీసులు ఘటనాస్థలాన్ని పరిశీలించి మృత దేహాలను స్వాధీనం చేసుకున్నారు. కేసు దర్యాప్తులో ఉంది.