అనిశాకు చిక్కిన ఉప తహసీల్దారు, సీనియర్‌ అసిస్టెంట్‌

రూ.3.50 లక్షలు తీసుకుంటూ పట్టుబడిన వైనం

మరికల్‌, నారాయణపేట, న్యూస్‌టుడే : ఆన్‌లైన్‌లో భూ మార్పిడి కోసం లంచం తీసుకుంటూ నారాయణపేటలో ఇద్దరు రెవెన్యూ ఉద్యోగులు అవినీతి నిరోధక శాఖ అధికారులకు పట్టుబడ్డారు. అనిశా డీఎస్పీ ఫయాజ్‌ తెలిపిన వివరాల ప్రకారం.. మరికల్‌ మండలంలోని రాకొండ గ్రామానికి చెందిన ఓ రైతు తన భూమిని ఆన్‌లైన్‌లో మార్చాలని తహసీల్దారు కార్యాలయంలో దరఖాస్తు చేసుకోగా.. ఇన్‌ఛార్జి తహసీల్దారు జగన్‌మోహన్‌, సీనియర్‌ అసిస్టెంట్‌ తాహెర్‌లు రూ.3.50 లక్షలు డిమాండ్‌ చేశారు. దీంతో ఆ రైతు హైదరాబాద్‌లో అవినీతి నిరోధక శాఖ అధికారులకు ఫిర్యాదు చేశారు. అనంతరం రైతు రెవెన్యూ అధికారులను సంప్రదించగా.. డబ్బు మహబూబ్‌నగర్‌లో ఇవ్వాల్సిందిగా చెప్పారు. ఈ విషయాన్ని అనిశా అధికారులకు చెప్పడంతో వారు గురువారం రసాయనాలు పూసిన కరెన్సీ నోట్లను రైతుకు ఇచ్చి పంపారు. మహబూబ్‌నగర్‌లో చెప్పిన చోటుకు సాయంత్రం వెళ్లి రైతు ఇన్‌ఛార్జి తహసీల్దారు జగన్‌మోహన్‌, సీనియర్‌ అసిస్టెంట్‌ తాహెర్‌లకు డబ్బు ఇస్తుండగా.. అనిశా అధికారులు ఆ ఇద్దరినీ రెడ్‌ హ్యాండెడ్‌గా పట్టుకున్నారు. అనంతరం వారిని మరికల్‌లోని కార్యాలయానికి తీసుకెళ్లి అర్ధరాత్రి వరకు విచారించారు.