కలెక్టర్‌, జేసీ ఫోర్జరీ సంతకాలతో ఎన్‌ఓసీ

రూ.కోట్ల విలువ భూమి విక్రయానికి వైకాపా కార్యకర్త ప్రయత్నం

అనంతపురం గ్రామీణం, న్యూస్‌టుడే: రూ.కోట్ల విలువైన భూములను అక్రమ పద్ధతుల్లో విక్రయించడానికి వైకాపాకు చెందిన ఓ కార్యకర్త కలెక్టర్‌, సంయుక్త కలెక్టర్ల సంతకాలనే ఫోర్జరీ చేసి నకిలీ నిరభ్యంతర ధ్రువీకరణ పత్రం (ఎన్‌ఓసీ) సృష్టించిన ఉదంతం అనంతపురంలో వెలుగుచూసింది. కూడేరు మండలం కమ్మూరులో సర్వేనెంబరు 525, 526లో 34 ఎకరాలు నిషేధిత జాబితాలో ఉన్నాయి. ఆ జాబితా నుంచి తొలగించాలని కోరుతూ భూ యాజమానులు దరఖాస్తు చేసుకున్నారు. ఆ దస్త్రం సంయుక్త కలెక్టరు వద్ద పెండింగ్‌లో ఉంది. కూడేరు మండలానికి చెందిన వైకాపా కార్యకర్త శ్రీసత్యసాయి జిల్లాకు చెందిన వ్యక్తితో కలిసి ఓ వీఆర్వో సాయంతో నకిలీ ఎన్‌వోసీ సృష్టించాడు. ఈ భూమిని ఇటీవల యజమానులు విక్రయానికి పెట్టారు. అదే మండలానికి చెందిన ఓ వ్యక్తి ఆర్టీఐ ద్వారా ఈ సమాచారం సేకరించారు. కలెక్టర్‌, సంయుక్త కలెక్టర్ల ఫోర్జరీ సంతకాలతో ఎన్‌ఓసీ జారీ చేసిన విషయం వాస్తవమేనని, దీనిపై విచారణ చేస్తున్నామని ఆర్డీవో మధుసూదన్‌ తెలిపారు.