అప్పుతీరక.. విత్తు మొలకెత్తక ఆగిన రైతు గుండె

బోథ్‌, న్యూస్‌టుడే: సోయా విత్తనాలు మొలకెత్తక దిగులు చెందిన రైతన్న రెండో సారి విత్తే క్రమంలో గుండెపోటుకు గురయ్యారు. ఈ ఘటన ఆదిలాబాద్‌ జిల్లా బోథ్‌ మండలంలో చోటుచేసుకుంది. గ్రామస్థుల వివరాల ప్రకారం.. మండలంలోని కుచులాపూర్‌ గ్రామానికి చెందిన ఎక్కర్ల శంకర్‌(50) తన నాలుగెకరాల పొలంతో పాటు కౌలుకు తీసుకున్న మరో నాలుగెకరాలలో సోయా విత్తనాలను విత్తారు. పది రోజులు గడిచినా మొలవకపోవడంతో దిగులు చెందారు. వ్యవసాయ అవసరాల కోసం 5 లక్షల వరకూ అప్పులు చేశారు. వాటిని ఎలా తీర్చాలని బాధపడుతూనే, మళ్లీ అప్పు చేసి విత్తనాలు కొని రెండో సారి విత్తుతూ సోమవారం సాయంత్రం గుండె పోటుకు గురయ్యారు. వెంటనే కుటుంబ సభ్యులు బోథ్‌లోని ఓ ప్రైవేటు ఆసుపత్రికి తరలించగా అప్పటికే మృతి చెందారు. మృతుడికి భార్య, కుమారుడు, కుమార్తె ఉన్నారు.