ఎస్‌బీఐ ఏజీఎంకు అయిదేళ్ల జైలు: సీబీఐ కోర్టు తీర్పు

ఈనాడు, హైదరాబాద్‌: హైదరాబాద్‌ ఎస్‌బీఐ అసిస్టెంట్‌ జనరల్‌ మేనేజర్‌ జి.వి.జె.మోహన్‌కు అయిదేళ్ల కఠిన కారాగార శిక్ష, రూ.1.25 లక్షల జరిమానా విధిస్తూ సీబీఐ కోర్టు తీర్పు వెలువరించింది. ఆయనతోపాటు భార్య బిందు వాణికి మూడేళ్ల జైలు శిక్ష, రూ.75 వేల జరిమానా విధించింది. రెండు చెక్‌లను దుర్వినియోగం చేయడం ద్వారా రూ.30 లక్షలను సొంత ఖాతాల్లోకి మళ్లించినందుకు సీబీఐ 2015 మార్చిలో కేసు నమోదు చేసింది. కెఎంవీ ప్రాజెక్ట్స్‌ నుంచి 2012లో రూ.20 లక్షలకు, 2013లో రూ.10 లక్షలకు రెండు చెక్‌లను మోసపూరితంగా మోహన్‌కుమార్‌ తీసుకున్నారు. లోన్‌ సిండికేట్‌ ఫీజు, కన్సార్టియం ప్రాసెసింగ్‌ ఫీజుగా ఈ మొత్తాలకు చెక్‌లను తీసుకుని సొంత ప్రయోజనాలకు వినియోగించుకున్నారని సీబీఐ ఆరోపించింది. బ్యాంకుకు రూ.30 లక్షలు, వడ్డీ నష్టం కలిగించారని సీబీఐ అభియోగ పత్రం దాఖలు చేసింది.