ఎమ్మెల్సీ అనంతబాబుకు హైకోర్టులో చుక్కెదురు

ఈనాడు, అమరావతి: దళిత యువకుడు సుబ్రహ్మణ్యం హత్య కేసులో నిందితుడైన వైకాపా ఎమ్మెల్సీ అనంతబాబుకు హైకోర్టులో చుక్కెదురైంది. డిఫాల్ట్‌ బెయిలు కోసం ఆయన వేసిన పిటిషన్‌ను హైకోర్టు కొట్టేసింది. న్యాయమూర్తి జస్టిస్‌ చీమలపాటి రవి సోమవారం ఈ మేరకు తీర్పు ఇచ్చారు. హత్య కేసులో తనను రిమాండ్‌కు పంపిన 90 రోజుల్లోగా దర్యాప్తు చేసి కింది కోర్టులో అభియోగపత్రం దాఖలు చేయనందున సీఆర్‌పీసీ సెక్షన్‌ 167(2) ప్రకారం డిఫాల్ట్‌ బెయిలు ఇవ్వాలంటూ అనంతబాబు హైకోర్టులో వ్యాజ్యం వేశారు. ఇటీవల ఈ వ్యాజ్యంపై వాదనలు ముగియడంతో తీర్పు వాయిదా పడింది. మరోవైపు తనకు సాధారణ బెయిలు మంజూరు చేయాలని అనంతబాబు వేసిన ఇంకో వ్యాజ్యంపై తీర్పును రిజర్వు చేస్తున్నట్లు న్యాయమూర్తి ప్రకటించారు.