ప్రైవేటు ఉద్యోగిని బలిగొన్న దా‘రుణ యాప్‌’

వేధింపులే కారణమంటూ బాధితుడి స్పష్టీకరణ

నిజాంపేట, న్యూస్‌టుడే: ‘రుణ యాప్‌లో అప్పు తీసుకుని తప్పు చేశాను.. ఠంచనుగా డబ్బులు కడుతున్నా అసభ్య పదజాలంతో వేధిస్తున్నారు.. ప్రధాని మోదీ, ముఖ్యమంత్రి కేసీఆర్‌లు ఇలాంటి యాప్‌లపై నిషేధం విధించాలి’ అంటూ ఓ వ్యక్తి బలవన్మరణానికి ముందు ఆవేదనతో చేసిన వినతి ఇది. హైదరాబాద్‌ బాచుపల్లి పోలీస్‌స్టేషన్‌ పరిధిలో సోమవారం ఈ దారుణం జరిగింది. మృతుడి బంధువులు, పోలీసుల కథనం ప్రకారం.. ఏపీలోని ఎన్టీఆర్‌ జిల్లా జి.కొండూరు మండలం వెలగలేరుకు చెందిన సి.హెచ్‌.రాజేష్‌(35) పదేళ్ల క్రితం నగరానికి వలసొచ్చారు. ఆయనకు భార్య సునీల, మూడేళ్ల కుమార్తె ఉన్నారు. బాచుపల్లి రాజీవ్‌గాంధీనగర్‌లోని ఆరో టవర్స్‌లో అద్దెకుంటూ ఓ ప్రైవేటు సంస్థలో పనిచేస్తున్నారు. భార్య ఇటీవల సొంతూరు వెళ్లడంతో ప్రస్తుతం ఒంటరిగా ఉంటున్నారు. సోమవారం మధ్యాహ్నం రాజేష్‌ చిరునామాకు కొరియర్‌ వచ్చింది. అది రాజేష్‌ భార్య పేరిట ఉండటంతో ఆ తెచ్చిన వ్యక్తి ఆమెకు ఫోన్‌ చేశాడు. ఈ క్రమంలో ఆమె తన భర్తకు ఫోన్‌ చేస్తున్నా.. ఎంతకీ ఎత్తకపోవడంతో అపార్ట్‌మెంట్‌ వాచ్‌మెన్‌కు ఫోన్‌ చేసి ఫ్లాట్‌కు వెళ్లి చూడాల్సిందిగా కోరింది. అతను వెళ్లి చూసేసరికి రాజేష్‌ ఉరేసుకుని కనిపించాడు. రాజేష్‌ చనిపోవడానికి ముందు అదే గదిలోని ఓ బోర్డుపై రుణయాప్‌ వేధింపుల కారణంగా తనువు చాలిస్తున్నట్లు రాసిపెట్టి ఉంది. అశ్లీల, గేమింగ్‌ యాప్‌ల మాదిరిగానే ‘రుణ యాప్‌’లను కూడా బ్లాక్‌ చేయాలంటూ ప్రధాని మోదీ, ముఖ్యమంత్రి కేసీఆర్‌లను అభ్యర్థిస్తూ ఆ బోర్డుపై ఆయన సూచించారు. అయితే రాజేష్‌ ఏ యాప్‌ నుంచి ఎంత రుణం తీసుకున్నాడనే వివరాలు తెలియరాలేదు.