పునాది గోతిలో పడి బాలుడి మృతి

సీతానగరం, న్యూస్‌టుడే: ఇంటి వద్ద ఆడుకుంటున్న నాలుగేళ్ల బాలుడు సామాజిక భవన నిర్మాణం పునాదుల కోసం తవ్విన గోతిలో పడి మృతిచెందాడు. కుటుంబ సభ్యులు, పోలీసులు తెలిపిన వివరాల ప్రకారం.. తూర్పుగోదావరి జిల్లా సీతానగరం మండలం రఘుదేవపురానికి చెందిన జామి ఏసు, స్వర్ణకుమారిల కుమారుడు రాజేష్‌(4) శుక్రవారం ఉదయం ఆడుకునేందుకు ఇంటి నుంచి బయటకు వెళ్లాడు. మధ్యాహ్నం వరకు రాకపోవడంతో సమీపంలోని అమ్మమ్మ ఇంటికి వెళ్లాడని భావించారు. అక్కడా కనిపించకపోవడంతో చుట్టుపక్కల వెతకగా సామాజిక భవన నిర్మాణానికి తీసిన గోతుల్లోని నీటిలో అతడి శవం కనిపించింది. గోతుల వద్ద ఎటువంటి రక్షణ ఏర్పాట్లు లేకపోవడం వల్లనే బాలుడు మృతి చెందాడని బాధితులు ఆందోళనకు దిగారు. రోడ్డు పక్కనే గోతులు తీసి వదిలేయడం దారుణమని మండిపడ్డారు.