Kamareddy: ఫొటోతీసి ‘సోదిక్లాస్‌’ అని పోస్టు పెడతావా?: విద్యార్థిని చితకబాదిన ఉపాధ్యాయురాలు

తల్లిదండ్రుల ధర్నా.. పోలీసులకు ఫిర్యాదు

మద్నూర్‌, న్యూస్‌టుడే: పాఠం చెప్తున్నప్పుడు ఫొటో తీసి..‘సోది క్లాస్‌’ అని పేర్కొంటూ ఒక విద్యార్థిని సామాజిక మాధ్యమాల్లో పెట్టడంతో ఆగ్రహించిన ఉపాధ్యాయురాలు ఆమెతో పాటు తరగతిలోని మరికొందరు అమ్మాయిలను చితకబాదారు. కామారెడ్డి జిల్లా మద్నూర్‌ మండలం మేనూర్‌ ఆదర్శ (మోడల్‌) పాఠశాలలో ఈ ఉదంతం చోటుచేసుకుంది. ఈ ఘటనపై తల్లిదండ్రులు ధర్నాకు దిగారు. పోలీసులకు మంగళవారం ఫిర్యాదు అందింది. వివరాలు ఇలా ఉన్నాయి. ఇంటర్‌ మొదటి సంవత్సరం విద్యార్థులకు నాలుగు రోజుల క్రితం తెలుగు ఉపాధ్యాయురాలు మహేశ్వరి పాఠం బోధిస్తుండగా ఓ విద్యార్థిని సెల్‌ఫోన్‌లో ఫొటో తీసింది. ‘సోది క్లాస్‌’ అని పేర్కొంటూ సామాజిక మాధ్యమంలో పోస్టు చేసింది. ఈ విషయం తెలుసుకున్న ఉపాధ్యాయురాలు తరగతి గదిలోకి సెల్‌ఫోన్‌ తీసుకురావడమే కాకుండా..తన ఫొటో ఎందుకు తీశావని నిలదీశారు. దాంతో విద్యారిన్థి తప్పయింది.. క్షమించండని వేడుకుంది. అయినప్పటికీ ఆగ్రహం తగ్గని ఉపాధ్యాయురాలు గది తలుపులు పెట్టి అమ్మాయిలను ఒకచోట నిలబెట్టి కొందరిని కర్రతో చితకబాదారు. ఈ ఘటనను కొందరు బాలురు వీడియో తీశారు. బాలికలు బోరున విలపిస్తూ విషయాన్ని తల్లిదండ్రులకు చెప్పడంతో వారు పాఠశాలకు చేరుకొని ఉపాధ్యాయురాలితో వాగ్వాదానికి దిగారు. ఆమెను సస్పెండ్‌ చేయాలని ధర్నా చేశారు. ఈ విషయంపై మహేశ్వరిని ‘న్యూస్‌టుడే’ సంప్రదించగా.. సామాజిక మాధ్యమంలో తన ఫొటో పెట్టినందుకు కొట్టిన మాట వాస్తవమేనని తెలిపారు. ఉన్నతాధికారులకు నివేదిక పంపి, వారి ఆదేశాల మేరకు చర్యలు తీసుకుంటానని ప్రిన్సిపల్‌ లావణ్య పేర్కొన్నారు.  మహేశ్వరిపై ఓ విద్యార్థిని మద్నూర్‌  స్టేషన్‌లో ఫిర్యాదు చేసినట్లు ఎస్సై శివకుమార్‌ తెలిపారు.