రాజస్థాన్‌లో పెళ్లి ఇంట సిలిండర్‌ పేలి ఏడుగురి మృతి

మరో 52 మందికి గాయాలు

జోధ్‌పుర్‌: రాజస్థాన్‌లోని జోధ్‌పుర్‌లో ఓ పెళ్లి ఇంట తీవ్ర విషాదం చోటుచేసుకుంది. స్టోర్‌రూంలో పెట్టిన వంటగ్యాస్‌ సిలిండర్‌ నుంచి గ్యాస్‌ లీకై పేలింది. దీంతో ఏడుగురు మృతి చెందారు. ఇందులో ముగ్గురు మహిళలు, ముగ్గురు చిన్నారులు ఉన్నారు. మరో 52 మంది గాయపడ్డారు. వరుడు.. అతని తల్లిదండ్రులు తీవ్రంగా గాయపడ్డారు. బారాత్‌కు ముందు అతిథులందరూ టీ తాగుతుండగా గురువారం రాత్రి ఒక్కసారిగా పేలుడు సంభవించింది. రాజస్థాన్‌ సీఎం అశోక్‌ గహ్లోత్‌ శుక్రవారం ఆసుపత్రిలో క్షతగాత్రులను పరామర్శించారు. డుంగర్‌ సింగ్‌ అనే పోలీసు అధికారి.. దగ్ధం అవుతున్న ఇంట్లో దూకి మంటలంటుకున్న సిలిండర్లను బయటకు తీసుకొచ్చారు. సింగ్‌ తెగువకు మెచ్చిన సీఎం గహ్లోత్‌ ఆయనకు పదోన్నతి ఇస్తున్నట్లు ప్రకటించారు.