IGI Airport: విమానం టాయ్‌లెట్‌లో రూ.2 కోట్ల బంగారం..!

దిల్లీ: కొంతమంది ప్రయాణికులు తమతోపాటు బంగారం, నగదు, ఇతరత్రా సామగ్రిని అక్రమంగా తరలించేందుకు ఎన్నెన్నో అడ్డదారులు తొక్కుతుంటారు. ఈ క్రమంలోనే విమానాశ్రయాల్లో తనిఖీల సందర్భంగా పట్టుబడుతుంటారు. అయితే, తాజాగా ఓ విమానం టాయ్‌లెట్‌లోనే పెద్ద మొత్తంలో బంగారం పట్టుబడింది. దిల్లీ(Delhi)లోని ఇందిరాగాంధీ అంతర్జాతీయ విమానాశ్రయం(IGI Airport)లో ఈ ఘటన వెలుగుచూసింది. విమానం టాయ్‌లెట్‌లో దాచి ఉంచిన సుమారు రూ.2 కోట్ల విలువైన నాలుగు బంగారు కడ్డీ(Gold Bars)లను కస్టమ్స్ అధికారులు(Customs) స్వాధీనం చేసుకున్నారు.

విదేశాల నుంచి వచ్చిన ఓ విమానంలో అక్రమంగా బంగారాన్ని తరలిస్తున్నట్లు వచ్చిన విశ్వసనీయ సమాచారం మేరకు ఐజీఐ ఎయిర్‌పోర్ట్‌లోని కస్టమ్స్ అధికారులు అప్రమత్తమయ్యారు. టర్మినల్‌- 2 లోని ఆ విమానంలో ఆదివారం తనిఖీలు చేపట్టారు. ఈ క్రమంలోనే వాష్‌రూమ్‌లోని సింక్‌ కింద టేప్‌తో అతికించిన ఓ పర్సును గుర్తించారు. అందులో 3969 గ్రాముల బరువున్న నాలుగు బంగారు కడ్డీలను స్వాధీనం చేసుకున్నారు. వీటి విలువ సుమారు రూ.2 కోట్లుగా ఉంటుందని ఓ అధికారిక ప్రకటనలో తెలిపారు. కేసు నమోదు చేసుకుని.. ఎవరు? ఎక్కడి నుంచి తరలిస్తున్నారో? గుర్తించే దిశగా దర్యాప్తు చేస్తోన్నట్లు పేర్కొన్నారు.