Assault: సంరక్షకురాలు కాదు రాక్షసి.. 8నెలల పసికందుపై ప్రతాపం

అహ్మదాబాద్‌: తమ చిన్నారులకు తాము లేని లోటు తీరుస్తుందని ఓ సంరక్షకురాలిని నియమించుకుంటే.. ఆమే వారిపై దాడికి పాల్పడింది. విచక్షణారహితంగా కొట్టింది తలను నేలకేసిబాదింది. ఈ అమానవీయ ఘటన గుజరాత్‌లోని సూరత్‌లో జరిగింది. దాడికి గురైన చిన్నారులను వైద్య పరీక్షల కోసం ఆసుపత్రిలో చేర్చారు.

సూరత్‌లోని రాందేర్‌ పలన్‌పుర్‌లో ఓ జంట నివాసముంటోంది. భార్యాభర్తలిద్దరు ఉద్యోగాలు చేస్తుండటంతో వారి చిన్నారులను చూసుకునేందుకు కళాబెన్‌ పటేల్‌ అనే సంరక్షకురాలిని నియమించుకున్నారు. కేర్‌టేకర్‌ ఉన్నప్పటికీ ఇంట్లో తరచూ పిల్లల ఏడుపులు వినొస్తున్నాయని పొరుగింటివారు చెప్పడంతో అనుమానం వచ్చి ఆ దంపతులు ఇంట్లో సీసీ కెమెరాలను అమర్చారు. దీంతో ఆ సంరక్షకురాలి కర్కశత్వం బయటపడింది. 8నెలల చిన్నారిని కిరాతకంగా కొడుతున్న దృశ్యాన్ని కెమెరా ఫుటేజీల్లో నిక్షిప్తమయ్యాయి. ఓ చిన్నారి తలను పదేపదే కింద కొట్టడం వీడియోలో కనిపించింది. నొప్పిని భరించలేక ఆ పసికందు ఇంకా ఎక్కువ ఏడుస్తుంటే చెంపలపై కొడుతుండటం రికార్డయ్యింది.

సాయంత్రం ఇంటికి చేరుకొని సీసీ ఫుటేజీని పరిశీలించిన తల్లిదండ్రులు ఆ దృశ్యాలను చూసి తల్లడిల్లిపోయారు. వెంటనే పోలీసుస్టేషన్‌కు చేరుకొని కేర్‌టేకర్‌పై ఫిర్యాదు చేశారు. కేసు నమోదు చేసుకున్న పోలీసులు దర్యాప్తు చేపట్టి నిందితురాలు కళాబెన్‌ పటేల్‌ను అదుపులోకి తీసుకున్నారు. ఆమెకి ఐదేళ్ల క్రితం వివాహం జరిగిందని ఇప్పటివరకు పిల్లలు లేరని పోలీసులు తెలిపారు.