‘నేను చనిపోతే కుమార్తెను నా భార్య సరిగా చూసుకోదు.. అందుకే!’

యాదగిరిగుట్టలో ఆరేళ్ల కుమార్తెతో సహా తండ్రి ఆత్మహత్య

యాదగిరిగుట్ట పట్టణం: కుటుంబ కలహాల నేపథ్యంలో ఓ తండ్రి కుమార్తెతో కలిసి ఆత్మహత్య చేసుకున్న ఘటన యాదగిరిగుట్ట పట్టణంలో శుక్రవారం చోటు చేసుకుంది.యాదగిరిగుట్ట సీఐ జానకిరెడ్డి, స్థానికులు తెలిపిన వివరాల ప్రకారం.. హైదరాబాద్‌ చందానగర్‌కు చెందిన చెరుకూరి సురేశ్‌ (40)కు భార్య, ఆరేళ్ల కుమార్తె శ్రేష్ఠ ఉన్నారు.  గురువారం ఉదయం సురేశ్‌ తన కుమార్తెను తీసుకొని యాదగిరిగుట్ట శ్రీలక్ష్మీనరసింహ స్వామి వారి దర్శనానికి వెళ్లారు. స్థానికంగా ఉన్న మయూరి గ్రాండ్‌ హోటల్‌లో ఒక గదిని అద్దెకు తీసుకున్నారు. శుక్రవారం అర్ధరాత్రి 12:40 గంటలకు హోటల్‌ బిల్డింగ్‌పై నుంచి కుమార్తెతో కలిసి సురేశ్‌ కిందకు దూకారు. గమనించిన స్థానికులు, హోటల్‌ నిర్వాహకులు అక్కడికెళ్లి చూడగా అప్పటికే ఇద్దరూ మృతి చెందారు. 

సమాచారం అందుకున్న యాదగిరిగుట్ట పోలీసులు ఘటనాస్థలానికి చేరుకొని మృతదేహాలను పరిశీలించారు. ఘటనాస్థలి వద్ద దొరికిన సూసైడ్‌ నోట్‌ ఆధారంగా.. సురేశ్‌ లింగంపల్లి బీఎస్ఎన్‌ఎల్‌ కార్యాలయంలో సబ్‌ డివిజినల్‌ ఇంజినీర్‌గా విధులు నిర్వహిస్తున్నట్లు గుర్తించారు. కుటుంబ కలహాల నేపథ్యంలో ఆత్మహత్య చేసుకున్నట్లు లేఖలో పేర్కొన్నారు. తాను చనిపోతే తన కూతురిని భార్య సరిగా చూసుకోదనే కారణంతో కుమార్తెతో కలిసి ఆత్మహత్య చేసుకున్నట్లు నోట్‌లో వివరించారు. ఈ మేరకు కేసు నమోదు చేసి దర్యాప్తు చేపట్టినట్లు సీఐ జానకిరెడ్డి తెలిపారు.