మద్యం మత్తులో బార్‌కు నిప్పు.. 11 మంది మృతి

మెక్సికో సిటీ: మద్యం మత్తులో ఓ వ్యక్తి చేసిన పని 11 మంది ప్రాణాలను బలిగొంది. మెక్సికోలోని సోనోరా (Sonora) రాష్ట్రంలోని శాన్‌ లూయిస్‌ రియో కొలరాడో (San Luis Rio Colorado) నగరంలో ఈ ఘటన చోటుచేసుకుంది. స్థానిక పోలీసులు తెలిపిన వివరాల ప్రకారం.. బార్‌కు వెళ్లిన ఓ వ్యక్తి పీకలదాకా మద్యం తాగాడు. అనంతరం బార్‌లోని మహిళలతో అసభ్యంగా ప్రవర్తిస్తుండటంతో.. బార్‌ భద్రతా సిబ్బంది అతన్ని బయటకు పంపించారు. ఇదే క్రమంలో అతను కొద్దిసేపు సెక్యూరిటీ సిబ్బందితో వాగ్వివాదానికి దిగాడు. ఆ తర్వాత అక్కణ్నుంచి వెళ్లిపోయాడు. 

ఒడెస్సాలో ప్రముఖ చర్చిని కుప్పకూల్చిన రష్యా..!

కొద్దిసేపటి తర్వాత ఆ వ్యక్తి బార్‌పై పెట్రోల్‌ బాంబుతో దాడి చేశాడని ప్రత్యక్ష సాక్షులు తెలిపారు. దీంతో ఒక్కసారిగా బార్‌లో మంటలు వ్యాపించాయి. బయటకి వెళ్లేందుకు ఒక్కటే దారి ఉండటంతో బాధితులు లోపల చిక్కుకుపోయారు. ఈ ఘటనలో ఆరుగురు మహిళలు సహా 11 మంది మృతి చెందడంతోపాటు, పలువురు గాయపడినట్లు పోలీసులు తెలిపారు. అనంతరం అగ్నిమాపక సిబ్బంది ఘటనా స్థలానికి చేరుకుని మంటలను అదుపులోకి తీసుకొచ్చారు. నిందితుణ్ని పోలీసులు అరెస్టు చేశారు. ఈ ఘటన మొత్తం అక్కడి సీసీటీవీ కెమెరాల్లో రికార్డు కావడంతో.. ఆ వీడియోలు సామాజిక మాధ్యమాల్లో వైరల్‌గా మారాయి.