Road Accident: జనరేటర్‌ వాహనం ఢీకొని ఇద్దరు మృతి.. తొమ్మిది మందికి తీవ్రగాయాలు

చేబ్రోలు: గుంటూరు జిల్లాలో రోడ్డు ప్రమాదం జరిగింది. జనరేటర్‌ తరలిస్తున్న వాహనం ఢీకొని ఇద్దరు మృతి చెందగా.. తొమ్మిది మందికి తీవ్ర గాయాలయ్యాయి. చేబ్రోలు మండలం వడ్లమూడి సమీపంలోని గరువుపాలెం వద్ద ఈ ఘటన చోటుచేసుకుంది. 

పోలీసులు తెలిపిన వివరాల ప్రకారం.. భారీ జనరేటర్‌ను ఓ ఆటోకు వెనకభాగంలో తాడుతో కట్టి నారాకోడూరు నుంచి తెనాలికి తరలిస్తున్నారు. ఈ క్రమంలో గరువుపాలెం వద్ద జనరేటర్‌-ఆటోకు కట్టిన తాడు తెగిపోయింది. అదేసమయంలో ఎదురుగా చుండూరు మండలం దిండిపాలెం గ్రామానికి చెందిన మహిళా కూలీలతో వస్తున్న ఆటో.. జనరేటర్‌ వాహనాన్ని ఢీకొట్టింది. ఈ ప్రమాదంలో రమణమ్మ(50), శాంబ(25) అక్కడికక్కడే మృతి చెందారు. తీవ్రంగా గాయపడిన మరో తొమ్మిది మందిని తెనాలి, గుంటూరు, వడ్లమూడి వైద్యశాలలకు తరలించారు. జనరేటర్‌ను మంగళవారం తెనాలిలో జరిగే సీఎం సభకు తరలిస్తున్నట్లు తెలిసింది.