ప్రకాశం జిల్లాలో దారుణం.. పోలీస్‌ స్టేషన్ ఎదుట యువకుడి ఆత్మహత్యాయత్నం

యర్రగొండపాలెం: ప్రకాశం జిల్లా యర్రగొండపాలెం పోలీస్‌ స్టేషన్‌ ఆవరణలో ఎస్సీ యువకుడు పెట్రోల్‌ పోసుకుని ఆత్మహత్యకు యత్నించిన ఘటన కలకలం రేపింది. బాధ్యులపై చర్యలు తీసుకోవాలని డిమాండ్‌ చేస్తూ బాధితుడి కుటుంబసభ్యులు, బంధువులు ఆందోళన చేపట్టారు. సంబంధం లేని కేసులో పోలీస్‌ స్టేషన్‌కు పిలిపించి, పోలీసులు కొట్టారని మనస్తాపానికి గురైన మోజేసు అనే యువకుడు బుధవారం పోలీస్‌ స్టేషన్‌ ఆవరణలో ఒంటిపై పెట్రోల్‌ పోసుకుని ఆత్మహత్యాయత్నం చేశాడు. తీవ్రంగా గాయపడిన అతడిని చికిత్స కోసం మార్కాపురం ప్రభుత్వ ఆసుపత్రికి తరలించారు.

యువకుడి పరిస్థితి విషమించడంతో మెరుగైన చికిత్స కోసం ప్రైవేటు ఆసుపత్రికి తరలించారు. కాగా, మోజేసు ఆత్మహత్యాయత్నానికి కారణమైన పోలీసులపై తక్షణమే చర్య తీసుకోవాలని యర్రగొండపాలెం పోలీస్‌ స్టేషన్‌ ఎదుట కుటుంబసభ్యులు, బంధువులు ఆందోళనకు దిగారు. పోలీసులకు వ్యతిరేకంగా నినాదాలు చేశారు. వైకాపా పాలనలో దళితులకు రక్షణ లేదని, బాధ్యులైన పోలీసు అధికారులపై తక్షణమే చర్యలు తీసుకోవాలని తెదేపా నాయకుడు ఎరిక్సన్‌ బాబు డిమాండ్‌ చేశారు.