జెండా ఎగరేస్తున్నారా.. ఈ జాగ్రత్తలు పాటించండి

ఓ ఇంటిపై రెపరెపలాడుతూ..

దండేపల్లి : దేశానికి స్వాతంత్య్రం వచ్చి 75 వసంతాలు అవుతోంది. దీనిని పురస్కరించుకుని ఆజాదీ కా అమృత్‌ మహోత్సవ్‌ వేడుకలను దేశమంతా ఘనంగా జరపుకొంటున్నాం. ఇందులో భాగంగా ప్రతీ ఇంటిపై జాతీయ పతాకం ఎగురవేయాలని ప్రభుత్వం సూచించడంతో జాతీయ జెండాలు ఇంటిపై రెపరెపలాడుతున్నాయి. అయితే జాతీయ జెండా ఎగురవేసే సమయంలో.. తర్వాత జెండాను భద్రపరిచే విషయంలో ప్లాగ్‌ కోడ్‌ ఆఫ్‌ ఇండియా చట్టం ప్రకారం కొన్ని నిబంధనలున్నాయి. జాతీయ జెండాను అవమానించితే కనీసం మూడేళ్లు జైలు శిక్ష అనుభవించాల్సి వస్తుంది.

ఎగురవేసే సమయంలో..
* జెండాను ఎగురవేసే సమయంలో చిరిగిపోకుండా, నలిగి పోకుండా చూసుకోవాలి.
* దీనిపై ఎలాంటి రాతలు ఉండకూడదు. ఎగువన కాషాయ రంగు.. దిగువన ఆకుపచ్చ రంగు ఉండేలా చూసుకోవాలి.
* దీనితో సమాన లేదా ఎత్తులో మరే జెండా ఉండకూడదు.

దించిన తర్వాత...
* జెండాను ఇళ్లలో ఇతర వస్తువులు, సామగ్రిపై కప్పకూడదు.
* నీటిపై తేలియాడనీయకూడదు.
* ఇంటిలో కాని బయట కాని దారి, కాలిబాటలో పడవేయకూడడు.
* దుస్తులు కుట్టించుకోవడం, అలంకరణ, ఇతర అవసరాలకు దీనిని వినియోగించకూడదు.
* హాని కలిగించే విధంగా ప్రదర్శించకూడదు.
* చాలా జాగ్రత్తగా దాచిపెట్టుకోవాలి.