2,08,329 మంది వజ్రాయుధాన్ని వదిలేశారు

పాయకరావుపేట, అనకాపల్లి నియోజకవర్గాల్లో ఆసక్తి చూపని ఓటర్లు

కలెక్టరేట్‌, న్యూస్‌టుడే: ఐదేళ్లకు ఒకసారి వచ్చే ఓట్ల పండగలో చాలా మంది ఓటు హక్కు వినియోగించుకోలేదు. జిల్లాలో 12,89,371 మంది ఓటర్లు ఉన్నారు. ఇందులో ఈ సారి 10,81,042 మంది ఓటు వేయగా, 208329 మంది ఓటర్లు ఓటు హక్కు వినియోగించుకోలేదు. ఒక్కో నియోజకవర్గంలో 30వేల నుంచి 44 వేల మంది ఓటింగ్‌కు దూరమయ్యారు. ప్రభుత్వ కార్యాలయాలు, బహిరంగ ప్రదేశాల్లో ఓటు హక్కు వినియోగంపై బ్యానర్లు, పోస్టర్లు ఏర్పాటు చేసి అవగాహన కల్పించినా ఫలితం ఇవ్వలేకపోయింది. ప్రభుత్వ, ప్రైవేటు, కార్మిక శాఖ, వర్తక, వాణిజ్య వ్యాపార సంస్థలకు సెలవు ప్రకటించినా ఓటర్లు బాధ్యతగా ముందుకు రాలేదు. అనకాపల్లి, ఎలమంచిలి, నర్సీపట్నం, పాయకరావుపేట, చోడవరం నియోజకవర్గాల్లో ఎక్కువ మంది ఓటింగ్‌కు దూరంగా ఉన్నారు. వేసవి సెలవులు కలసి రావడంతో చాలామంది ఇతర ప్రాంతాలకు వెళ్లి పోయి ఓటింగ్‌కు రాలేదు. థర్డ్‌ జెండర్‌ కేటగిరీలో 28 మంది ఓటర్లకు కేవలం 12 మంది మాత్రమే ఓటు హక్కు వినియోగించుకున్నారు. అత్యధికంగా పాయకరావుపేట నియోజకవర్గంలో 44118 మంది, అనకాపల్లి నియోజకవర్గంలో 43132 మంది ఎన్నికల్లో వజ్రాయుధాన్ని వదులుకున్నారు.