AndhraPradesh News: ఎన్టీఆర్‌, వైఎస్‌ఆర్‌..ఇద్దరికీ భారతరత్న ఇవ్వాలి: కొడాలి నాని

గుడివాడ: ఎన్టీఆర్‌ జిల్లా పేరు పెట్టిన సీఎం జగన్‌కు పాదాభివందనాలు చేస్తున్నట్లు మంత్రి కొడాలి నాని అన్నారు. విజయవాడకు ఎన్టీఆర్‌ జిల్లాగా నామకరణం చేయడాన్ని హర్షిస్తూ కృష్ణా జిల్లా గుడివాడలోని ఎన్టీఆర్‌ విగ్రహానికి ఆయన క్షీరాభిషేకం చేశారు. ఈ సందర్భంగా ఆయన మాట్లాడుతూ.. ఎన్టీఆర్‌, వైఎస్‌ఆర్‌ ఇద్దరికీ భారతరత్న ఇవ్వాలన్నారు.

దీంతో పాటు గుడివాడలో క్యాసినో ఆరోపణల నేపథ్యంలో మరోసారి స్పందించారు. ‘‘గుడివాడలో క్యాసినో నిర్వహించామని తెదేపా నాయకులు అల్లరి చేశారు. క్యాసినోకు రూ.500కోట్లు వచ్చాయంటున్నారు. 50 క్యాసినోలు ఉన్న గోవాలో ఎన్ని వేల కోట్ల రూపాయలు రావాలి. గుడివాడలో నన్ను ఓడించలేకే లేనిపోని ప్రచారాలు చేస్తున్నారు. ఇక్కడి ప్రజలకు అన్ని విషయాలు తెలుసు. గుడివాడలో 3 రోజుల క్యాసినోకు 362రోజులు ప్రచారం చేస్తున్నారు. తెదేపా నేతలకు జీవితకాలం సమయమిచ్చా.. ఇక వాళ్ల ఇష్టం’’ అని కొడాలి నాని విమర్శించారు.