వేతనాలివ్వకపోతే కుటుంబాలనెలా పోషించాలి?

నిరసన తెలుపుతున్న కార్మికులు

పుట్టపర్తి, న్యూస్‌టుడే: నెలనెలా జీతాలు ఇవ్వకపోతే కార్మికులు కుటుంబాలనెలా పోషించుకోవాలని సత్యసాయి తాగునీటి పథకం కార్మికుల యూనియన్‌ జిల్లా కార్యదర్శి మధుసూదన్‌ ప్రశ్నించారు. శనివారం పుట్టపర్తి సత్యసాయి తాగునీటి పథకం వద్ద కార్మికులు నిరసన తెలిపారు. సత్యసాయి తాగునీటి పథకం నిర్వహణ బాధ్యతలను ప్రభుత్వమే చేపట్టాలని, వెంటనే జీతాలు చెల్లించాలని డిమాండ్‌ చేశారు. ఎల్‌అండ్‌టీ సంస్థ ప్రతినెలా కార్మికులకు వేతనాలు అందించేదని, సంస్థ 2021 జూన్‌ నుంచి నిర్వహణ బాధ్యత నుంచి తప్పుకుందని, అప్పటి నుంచి ముగ్గురు గుత్తేదారులు తప్పుకున్నారని, నిర్వహణ గాడి తప్పిందని వాపోయారు. పెండింగ్‌లోని నాలుగు నెలలు వేతనాలు, పీఎఫ్‌, తొమ్మిది నెలల ఈఎస్‌ఐ బకాయిలు వెంటనే జమ చేయాలని కోరారు. కార్యక్రమంలో యూనియన్‌ జిల్లా కోశాధికారి రాము, సభ్యులు శ్రీనివాసులు, చంద్రశేఖర్‌, చందు, నాగరాజు, ఓబిలేసు, బాబాసాహెబ్‌, తిమ్మారెడ్డి, శంకర్‌ తదితరులు పాల్గొన్నారు.