పోస్టల్‌ బ్యాలెట్‌ వినియోగించుకోండి

మాట్లాడుతున్న కలెక్టర్‌ వినోద్‌కుమార్‌, నగర కమిషనర్‌ స్వరూప్‌, డీపీఓ ప్రభాకర్‌రావు

జిల్లా సచివాలయం, న్యూస్‌టుడే: ఎన్నికల విధులకు నియామకం పొందిన ఉద్యోగ, ఉపాధ్యాయులందరూ పోస్టల్‌ బ్యాలెట్‌ ద్వారా ఓటు హక్కును వినియోగించు కోవాలని కలెక్టర్‌ డాక్టర్‌ వినోద్‌కుమార్‌ పేర్కొన్నారు. మంగళవారం రెవెన్యూ భవన్‌లో ఈవీఎం నోడల్‌ అధికారి/అనంత నగర కమిషనర్‌ మేఘాస్వరూప్‌, డీపీఓ/నోడల్‌ అధికారి ప్రభాకర్‌రావుతో కలిసి ఆయన విలేకరులతో మాట్లాడారు. ప్రస్తుత సార్వత్రిక ఎన్నికల విధులకు అన్ని కేడర్ల సిబ్బంది 23,900 మందిని నియమించినట్లు, ఇందులో ఇప్పటిదాకా ఫాం-12 11,470 మంది మాత్రమే ఇచ్చారని, ఈ జిల్లాలో పని చేస్తున్న ఇతర జిల్లాల నివాసితులు 888 మంది ఉన్నారని వివరించారు. ఇతర జిల్లాలవారు అయితే ఈనెల 26లోపు, జిల్లాకు సంబంధించిన వారైతే ఈ నెల 28 దాకా ఫాం-12 ఇవ్వవచ్చన్నారు. పనిచేసే ప్రాంతాల్లోని ఆర్వోలకే ఫాం-12 ఇవ్వాలని సూచించారు.  జిల్లాలోని 85పైన వయసు కలిగిన వయోవృద్ధులు, దివ్యాంగుల కోసం హోం ఓటింగ్‌ సదుపాయాన్ని కల్పించామని, జిల్లాలో వయోవృద్ధులు 9828 మంది ఉంటే.. 611 మంది ఇంటి వద్దే ఓటు వేస్తామని ఫాం-12డీ ఇచ్చారు. ఇదే తరహాలోనే దివ్యాంగులు 26,097 మంది ఉంటే 693 మంది ఐచ్ఛికం ఇచ్చారన్నారు. ఈనెల 16 నుంచి 23 దాకా ఫాం-12డీ తీసుకున్నామని చెప్పారు. వీరందరికీ మే 5 నుంచి 9 దాకా హోం ఓటింగ్‌ సౌకర్యం కల్పిస్తామన్నారు.