జూబ్లీహిల్స్‌, న్యూస్‌టుడే: సినీ నటుడు జూనియర్‌ ఎన్టీఆర్‌ జన్మదినం సందర్భంగా జూబ్లీహిల్స్‌లోని ఆయన నివాసానికి పెద్ద సంఖ్యలో తరలివచ్చిన అభిమానులు అర్ధరాత్రి హల్‌చల్‌ చేశారు. శుక్రవారం జూనియర్‌ ఎన్టీఆర్‌ జన్మదినం సందర్భంగా అభిమానులు గురువారం రాత్రి 11 గంటల నుంచే ఆయన ఇంటి వద్దకు చేరుకున్నారు. ఎన్టీఆర్‌ జిందాబాద్‌, హ్యాపీ బర్త్‌డే ఎన్టీఆర్‌, సీఎం అంటూ నినాదాలు చేశారు. కేక్‌ తీసుకొచ్చి కట్‌ చేసి పంచారు. టపాసులు పేల్చారు. అతి సమీపంలోనే ఉపరాష్ట్రపతి వెంకయ్యనాయుడి నివాసం ఉంది. గురువారం సాయంత్రమే ఉపరాష్ట్రపతి జూబ్లీహిల్స్‌లోని ఇంటికి చేరుకున్నారు. ఎన్టీఆర్‌ అభిమానులు వెంకయ్యనాయుడు నివాసం వైపు వెళ్లకుండా బారికేడ్లు, అదనపు సిబ్బందిని మోహరించారు. అభిమానులను దూరంగా పంపేందుకు పోలీసులు యత్నించినా ఫలితం లేకపోవడంతో లాఠీలకు పని చెప్పారు.