సాఫ్ట్‌వేర్‌ కొలువు పేరుతో మోసం

జూబ్లీహిల్స్‌, న్యూస్‌టుడే: సాఫ్ట్‌వేర్‌ సంస్థలో కొలువు పేరుతో మోసానికి పాల్పడిన ఓ సంస్థ నిర్వాహకుడిపై బంజారాహిల్స్‌ ఠాణాలో కేసు నమోదైంది. పోలీసులు తెలిపిన వివరాల ప్రకారం.. రోడ్‌ నంబరు 12లో కెరీర్‌ క్రాఫ్ట్స్‌ పేరుతో కన్సల్టెన్సీ కార్యాలయాన్ని కపులూరు గోపీరెడ్డి నిర్వహించేవాడు. ఏలూరు జిల్లా నూజువీడు మండలం మిట్టగూడెంవాసి మారీడు వేణుగోపాల్‌రావు 2018లో బీసీఏ పూర్తిచేసిన తన సోదరి వరుసైన కొచ్చర్ల మేరీ శిరీష కోసం గోపీరెడ్డిని కలిశాడు. ఓ ఐటీ సంస్థలో ఉద్యోగమిప్పిస్తానని, రూఏ.2.50 లక్షలు కన్సల్టెన్సీ ఛార్జిగా ఇవ్వాలని అతడు తెలిపాడు. రూ.1.8లక్షలు మే 21న చెల్లించారు. ఆన్‌లైన్‌ ఇంటర్వ్యూ నిర్వహించడంతో పాటు ఆఫర్‌ లెటర్‌ తెప్పించాడు. అనంతరం సమాచారం లేదు. ఈనెల 26న గోపీరెడ్డికి ఫోన్‌ చేయగా అందుబాటులో లేదు. అనంతరం సంస్థ బోర్డు తిప్పేసినట్లు గుర్తించి పోలీసులను ఆశ్రయించారు. ఇలాగే మోసపోయామని పసుమర్తి వరుణ్‌, శ్రీనివాసరావు, శ్రవణ్‌కుమార్‌ ఫిర్యాదుచేశారు. నిందితుడిపై కేసు నమోదుచేసి దర్యాప్తు చేస్తున్నారు.