యెమెన్‌ దేశానికి వెళ్లిన వ్యక్తిపై కేసు

శంషాబాద్‌, న్యూస్‌టుడే: భారత విదేశాంగ శాఖ నిబంధనలను ఉల్లంఘించి యెమెన్‌ దేశానికి వెళ్లిన వ్యక్తిని గురువారం శంషాబాద్‌ విమానాశ్రయంలో ఇమ్మిగ్రేషన్‌ అధికారులు అదుపులోకి తీసుకొన్నారు. వారు తెలిపిన కథనం ప్రకారం.. ఏపీలోని తూగో జిల్లా కాకినాడకు చెందిన రాజేశ్‌ ఉపాధి కోసం దుబాయి వెళ్లాడు. అక్కడి నుంచి కేంద్ర ప్రభుత్వం నిషేధం విధించిన యెమెన్‌ దేశానికి వెళ్లి, రెండేళ్లకు పైగా ఉన్నాడు. తిరిగి దుబాయ్‌ మీదుగా ఇండిగో ఎయిర్‌లైన్స్‌ విమాన సర్వీస్‌లో స్వదేశానికి బయల్దేరాడు. శంషాబాద్‌ విమానాశ్రయానికి చేరుకొన్న రాజేశ్‌ పాస్‌పోర్ట్‌, వీసా పత్రాలను పరిశీలించగా యెమెన్‌ దేశానికి వెళ్లినట్లు తేలింది. అదుపులోకి తీసుకుని ఆర్జీఐఏ పోలీసులకు అప్పగించారు. కేసు నమోదు చేసి దర్యాప్తు చేస్తున్నారు.