జల్సాలకు అలవాటుపడి చోరీల బాట

నాగోలు, న్యూస్‌టుడే: రాత్రి వేళ ఒంటరిగా వెళ్తున్న వారిని లక్ష్యంగా చేసుకుని చోరీలకు పాల్పడుతున్న ముఠాలోని నలుగురిని ఎల్బీనగర్‌ పోలీసులు రిమాండ్‌కు తరలించారు. డీఐ ఉపేందర్‌రావు కథనం ప్రకారం... సూర్యోదయనగర్‌లో నివసించే నడిపల్లి శిశుపాల్‌(33) ఈ నెల 1న  ఎల్బీనగర్‌లో ఒంటరిగా నడిచి ఇంటికి వెళ్తుండగా.. రెండు బైకులపై వచ్చిన నలుగురు యువకులు అటకాయించారు. జేబులన్నీ వెతికారు. వెండి మొలతాడుతోపాటు కొంత నగదును లాక్కుని పరారయ్యారు. బాధితుని ఫిర్యాదుమేరకు పోలీసులు సీసీ ఫుటేజీ ఆధారంగా దర్యాప్తు ప్రారంభించారు. శనివారం సాగర్‌రింగురోడ్డు చౌరస్తా వద్ద ఆ నలుగురు అనుమానాస్పదంగా కనిపించడంతో అదుపులోకి తీసుకున్నారు. విచారించగా అసలు నేరం బయటపడింది. వీరిలో ఓర్సు మహేష్‌(21) గుర్రంగూడ సమీపంలోని శ్రీ అవెన్యూ కాలనీలో, మోటం అర్జున్‌(21), కొమ్మూరి మణికంఠ(23), అనిమల్ల జలేందర్‌(20) సమీపంలోని శ్రీనివాసపురంలో ఉంటున్నారు. ముఠాలోని బాలకృష్ణ అనే మరో నిందితుడితో కలిసి నారపల్లి, ఉప్పల్‌ ప్రాంతాల్లో పలు దొంగతనాలు  చేశారు. రూ.50వేల సొత్తును పోలీసులు స్వాధీనం చేసుకున్నారు. బాలకృష్ణ పరారీలో ఉన్నాడు.