ప్రశాంతంగా ఎమ్మెల్సీ ఉప ఎన్నిక

ఓటు వేసి వస్తున్న ఎమ్మెల్యే వీర్లపల్లి శంకర్‌

ఈనాడు, మహబూబ్‌నగర్‌, షాద్‌నగర్‌, న్యూస్‌టుడే: మహబూబ్‌నగర్‌ స్థానిక సంస్థల ఎమ్మెల్సీ ఉప ఎన్నిక గురువారం ప్రశాంతంగా ముగిసింది. ఉమ్మడి జిల్లాలో 1,439 ఓట్లకుగాను 1,437 ఓట్లు పోలయ్యాయి. ఓటేసిన వాళ్లలో 19 మంది ఎక్స్‌అఫీషియో సభ్యులు కూడా ఉన్నారు. ముఖ్యమంత్రి రేవంత్‌రెడ్డి, మంత్రి జూపల్లి కృష్ణారావు, ఎంపీలు మన్నె శ్రీనివాస్‌రెడ్డి, పి.రాములు, ఎమ్మెల్సీలు కూచుకుళ్ల దామోదర్‌రెడ్డి, చల్లా వెంకట్రాంరెడ్డి, సత్యవతి రాథోడ్‌, పలువురు తమ ఓటు హక్కును వినియోగించుకున్నారు. ఉమ్మడి జిల్లా కలెక్టర్లు వెబ్‌ క్యాస్టింగ్‌ ద్వారా పోలింగ్‌ తీరును పరిశీలించారు.   మొదటి ప్రాధాన్య ఓటుతోనే తాము గెలుస్తామన్న నమ్మకంలో కాంగ్రెస్‌ అభ్యర్థి మన్నె జీవన్‌రెడ్డి ఉన్నారు. ప్రస్తుతం ఉన్న ఓటర్లలో మెజారిటీ శాతం భారాసకు చెందిన ప్రజాప్రతినిధులే ఉన్నారని వారంతా తమకే ఓటు వేశారని భారాస అభ్యర్థి నవీన్‌కుమార్‌రెడ్డి భావిస్తున్నారు. ఏప్రిల్‌ 2న విజేత ఎవరో తేలనుంది. భారాస అభ్యర్థి నవీన్‌కుమార్‌రెడ్డి, కాంగ్రెస్‌ అభ్యర్థి మన్నె జీవన్‌రెడ్డి, సీఎం రేవంత్‌రెడ్డి సోదరుడు తిరుపతిరెడ్డిలు పలు పోలింగ్‌ కేంద్రాల్లో పర్యటించి ఓటింగ్‌ సరళిపై ఆరా తీశారు.  షాద్‌నగర్‌లోని  పోలింగ్‌ కేంద్రంలో వంద శాతం ఓటింగ్‌ జరిగినట్లు ఆర్డీవో వేణుమాధవరావు తెలిపారు. ఎమ్మెల్యే వీర్లపల్లి శంకర్‌తో పాటు మాజీ ఎమ్మెల్యే ప్రతాప్‌రెడ్డి ఓటింగ్‌ సరళిని పరిశీలించారు.