సివిల్స్‌ ర్యాంకర్లను సత్కరించిన మాజీ ఉపరాష్ట్రపతి వెంకయ్యనాయుడు

హైదరాబాద్‌: భరతమాతకు సేవ చేసే అరుదైన అవకాశం సివిల్‌ సర్వీస్‌ ర్యాంకర్లకు మాత్రమే లబిస్తుందని, దాన్ని సద్వినియోగం చేసుకోవాలని మాజీ ఉప రాష్ట్రపతి ఎం.వెంకయ్యనాయుడు సూచించారు. కృష్ణప్రదీప్‌ ట్వంటీఫస్ట్‌ సెంచరీ ఐఏఎస్‌ అకాడమీ శిక్షణతో సివిల్స్‌ ర్యాంకులు సాధించిన 35 మందిని వెంకయ్యనాయుడు చేతుల మీదుగా ఘనంగా సన్మానించారు. హైదరాబాద్‌లోని ఓ ప్రైవేటు హోటల్‌లో జరిగిన ఈకార్యక్రమంలో దూరదర్శన్‌ మాజీ అదనపు డీజీ పద్మనాభరావు తదితరులు పాల్గొన్నారు.

ఈ సందర్భంగా వెంకయ్య నాయుడు మాట్లాడుతూ... ‘‘ఈ పయనం మీ జీవితాల్నే కాదు.. ఈ దేశాన్నే మారుస్తుంది. సమాజం, ప్రజలు, దేశం అన్నింటిలో పరివర్తన తీసుకొస్తుంది. మీది కేవలం ఉద్యోగం కాదు.. భరతమాతకు సేవ చేసే అరుదైన అవకాశం. మీ నిబద్ధతే దేశ భవిష్యత్తును తీర్చిదిద్దుతుంది. మీపై అనేక ఒత్తిడిలు ఉంటాయి. రాజకీయ బాస్‌లు ఉంటారు. కానీ, మీకు అసలైన బాస్‌ ఎవరంటే దేశ ప్రజలే’’ అని సివిల్స్‌ ర్యాంకర్లకు దిశానిర్దేశం చేశారు.