ఒకే రోజు రెండు చోట్ల ఎన్నికల విధులా..!

కోరుట్ల, న్యూస్‌టుడే: పార్లమెంటు ఎన్నికల పోలింగ్‌ ఈనెల 13న జరగనుంది. ఎన్నికల నిర్వహణ కోసం అధికారులు ఇప్పటికే ఉద్యోగులను గుర్తించి విధులు కేటాయించారు. కొంతమందికి ఎన్నికల నిర్వహణపై గతంలోనే శిక్షణ ఇవ్వగా, మిగతా వారికి త్వరలో శిక్షణ ఇచ్చేందుకు ఏర్పాట్లు చేస్తున్నారు. ఇటీవల ఉద్యోగులకు ఎన్నికల విధులు కేటాయిస్తూ అధికారులు ఉత్తర్వులు జారీ చేశారు. జిల్లా వ్యాప్తంగా పలువురు ఉద్యోగులకు 020-కోరుట్ల, 021-జగిత్యాల శాసనసభ నియోజకవర్గాల్లో రెండుచోట్ల ఒకేరోజు ఎన్నికల విధులు నిర్వహించాలని ఉత్తర్వులు జారీ కావడంతో అయోమయానికి లోనవుతున్నారు. ఎన్నికల రోజు ఒకస్థానంలో రిజర్వ్‌గా ఉంచగా, మరోచోట విధులు కేటాయిస్తూ ఉత్తర్వులు జారీ చేశారు. వారు ఈనెల 12న ఆయా నియోజకవర్గ కేంద్రాల్లోని పంపిణీ కేంద్రాల్లో హాజరుకావాలని ఉత్తర్వుల్లో పేర్కొనడంతో రెండుచోట్ల విధులకు హాజరుపై ఆందోళన చెందుతున్నారు.