సాధనతో సమున్నత ఫలితాలు

ఆరోగ్య సౌధలో డాక్టర్‌ అరుంధతి చంద్రశేఖర్‌ నేతృత్వంలో గాలిబుడగలను ఎగురవేస్తున్న అధికారులు

బెంగళూరు (యశ్వంతపుర), న్యూస్‌టుడే : ఆధునిక సమాజంలో బాలికలు అన్ని రంగాల్లోనూ ముందంజ వేస్తున్నారని జాతీయ ఆరోగ్య మిషన్‌ సంచాలకురాలు డాక్టర్‌ అరుంధతి చంద్రశేఖర్‌ సంతృప్తి వ్యక్తం చేశారు. అంతర్జాతీయ బాలికల దినోత్సవం సందర్భంగా సోమవారం స్థానిక ఆరోగ్యసౌధలో ఏర్పాటు చేసిన కార్యక్రమంలో సాటి మహిళ ఉద్యోగులు అధికారులతో కలిసి కేకు కోశారు. అనంతరం గులాబీ రంగు బెలూన్లను గాలిలో ఎగురవేశారు. ఈసందర్భంగా ఆమె మాట్లాడుతూ బాలికలు ఎందులోనూ తీసిపోరని, అన్నింట్లో బాలలతో పోటీ పడుతున్నారని తెలిపారు. కరోనా నియంత్రణలో మహిళల పాత్ర ఎక్కువగా ఉందన్నారు. మహిళలు చదువుకుంటే సమున్నత ఫలితాల శిఖరాలు చేరుకోవచ్చన్నారు. కార్యక్రమంలో కేఎస్‌ఏపీఎస్‌ సంచాలకురాలు లీలావతి తదితరులు పాల్గొన్నారు.