బొమ్మైకి దిల్లీ పిలుపు

బెంగళూరు (శివాజీనగర), న్యూస్‌టుడే : తమతో భేటీ కావాలని ముఖ్యమంత్రి బసవరాజ బొమ్మైకి కేంద్ర హోం మంత్రి అమిత్‌షా కబురు పంపించారు. సెక్స్‌ స్కాండల్‌ సీడీ కేసు అంశంపై మాజీ మంత్రి రమేశ్‌ జార్ఖిహొళి ఇప్పటికే షాను కలుసుకుని పీసీసీ అధ్యక్షుడు డీకే శివకుమార్‌పై ఫిర్యాదు చేశారు. తనను పావుగా చేసి, సీడీని తయారు చేయించేందుకు డీకే రూ.40 కోట్లు ఖర్చు చేశారని ఆరోపించారు. సీబీఐ దర్యాప్తునకు ఆదేశిస్తే అన్ని వాస్తవాలూ వెలుగులోకి వస్తాయని షాకు విన్నవించారు. ఈ అంశాన్ని తనకు అనువుగా మలుచుకునేందుకు కమలనాథులు వ్యూహాలకు తెరతీశారు. సీబీఐ దర్యాప్తునకు ఆదేశించి శివకుమార్‌ను కట్టడి చేయాలని యోచిస్తున్నారనేది కాంగ్రెస్‌ నేతల అనుమానం. షా సూచనకు అనుగుణంగా ఆదివారమే బొమ్మై హస్తినకు వెళ్లేందుకు సిద్ధమయ్యారు. ప్రధాని కర్ణాటకకు సోమవారం వస్తుండగా, షా ఆపై శనివారం రానున్నారు. ఇప్పటికే ప్రజాధ్వని పేరిట బస్సు యాత్రలతో ప్రజలలోకి వెళుతున్న కాంగ్రెస్‌ పార్టీ నాయకులను కొంత వరకు కట్టడి చేస్తేనే తమ విజయావకాశాలు మరింత మెరుగు అవుతాయని కమలనాథులు భావిస్తున్నారు.