తెదేపా కార్యకర్తలపై దాడి అమానుషం

మాజీ ఎమ్మెల్యే బీసీ జనార్దన్‌రెడ్డి  

పోలీస్‌స్టేషన్‌ సమీపంలో నిరసన వ్యక్తం చేస్తున్న మాజీ ఎమ్మెల్యే బీసీ

బనగానపల్లి, న్యూస్‌టుడే: రాజకీయ కక్ష ఉంటే నన్నే ఎన్‌కౌంటర్‌ చేయండి కానీ తెదేపా సానుభూతిపరులు, కార్యకర్తలపై దాడులు చేయడం తగదని బనగానపల్లి మాజీ ఎమ్మెల్యే బీసీ జనార్దన్‌రెడ్డి ఆగ్రహం వ్యక్తం చేశారు. మండలంలో పెద్దరాజుపాలెంకు చెందిన చెన్నబోయిన సుబ్బరాయుడిపై దాడి చేసిన ఎస్సై శంకర్‌నాయక్‌ను సస్పెండు చేయాలని కోరుతూ శుక్రవారం రాత్రి  పోలీస్‌స్టేషన్‌ సమీపంలో కార్యకర్తలతో కలిసి ధర్నా చేపట్టారు.  పొలం విషయంలో సుబ్బరాయుడిని పంచాయితీకి పిలిచి దాడి చేశారన్నారు.  తెదేపా కార్యకర్తల జోలికి రావొద్దు.. కక్ష ఉంటే నన్నే ఎన్‌కౌంటర్‌ చేయాలన్నారు. అసలు ప్రజాస్వామ్యంలో ఉన్నామా అని ప్రశ్నించారు.  దాడి చేసిన ఎస్సైపై కేసు నమోదు చేయకపోతే న్యాయపోరాటం చేస్తామన్నారు. ఇటీవల యర్రగుడిలో ప్రజాభిప్రాయ సేకరణకు వెళ్లిన ప్రజలపై పోలీసులు కేసులు నమోదు చేయడం ఏంటని ప్రశ్నించారు.  ప్రభుత్వ ఆసుపత్రికి వెళ్లి సుబ్బరాయుడిని పరామర్శించారు. ఆసుపత్రి వద్దకు పెద్ద సంఖ్యలో కార్యకర్తలు చేరుకోవడంతో అక్కడ ఉద్రిక్తత నెలకొంది.