సారొచ్చి వెళ్లారు.. అవస్థలు మిగిల్చారు

న్యూస్‌టుడే, పత్తికొండ పట్టణం: ముఖ్యమంత్రి జగన్‌మోహన్‌రెడ్డి పర్యటన సందర్భంగా హడావుడిగా మురుగు కాల్వలు తీసిన గ్రామపంచాయతీ అధికారులు నిర్మాణాలు  వదిలేశారు. పత్తికొండ పట్టణంలో ఈ నెల ఒకటో తేదీన ముఖ్యమంత్రి పర్యటన సందర్భంగా పట్టణంలోని కర్నూలు రహదారిలో కుడివైపు మురుగు కాల్వపై ఉన్న బండలు తొలగించి తవ్వారు. తర్వాత ఎలాంటి నిర్మాణాలు చేపట్టలేదు. ముఖ్యమంత్రి పర్యటన ముగిసి 21 రోజులు గడిచినా.. ఇంత వరకు గ్రామపంచాయతీ అధికారులు కాల్వ నిర్మాణంపై మాత్రం దృష్టిసారించడంలేదు. కర్నూలు రహదారిలోని పాతబస్టాండ్‌ అంబేడ్కర్‌ కూడలి నుంచి సెయింట్‌ జోసఫ్‌ పాఠశాల వరకు వివిధ దుకాణాల యజమానులతో పాటు ప్రజలు ఇబ్బందులు పడుతున్నారు. దుకాణాలకు వెళ్లేందుకు నిర్మాణాలు చేపట్టకపోవడంతో కాలువపైనే చెక్కలు, ఇనుపకడ్డీలు, బండలు, కర్రలు వేసుకుని నడకసాగిస్తున్నారు.  కాల్వ నిర్మాణం చేపట్టాలని పట్టణవాసులు కోరుతున్నారు.