సచివాలయమా.. వైకాపా కార్యాలయమా

పార్టీ కార్యక్రమాలకు వేదిక
సచివాలయంలోనే సిద్ధం సభ

అగ్రహారం సచివాలయంలో సిద్ధం పోస్టర్లతో వైకాపా నాయకులు

మద్దికెర, న్యూస్‌టుడే: వైకాపా నాయకులు, కార్యకర్తలు ప్రభుత్వ కార్యాలయాలను పార్టీ కార్యక్రమాలకు వేదికలుగా మార్చుకుంటున్నారు. కర్నూలు జిల్లా మద్దికెర మండలంలోని అగ్రహారం గ్రామ సచివాలయంలో అధికార పార్టీ నాయకులు, కార్యకర్తలు సచివాలయాల కన్వీనర్లతో శనివారం ‘సిద్ధం సభ’కు అవగాహన కల్పించారు. పోస్టర్లు ఆవిష్కరించారు. మద్దికెర, అగ్రహారం, పెరవలి తదితర గ్రామాల్లోని సచివాలయాల్లో నిత్యం వైకాపా నాయకులు పార్టీ సమావేశాలను అక్కడే నిర్వహిస్తూ పంచాయతీ, సచివాలయాల సిబ్బంది విధులకు ఆటంకంగా మారారని స్థానికులు చెబుతున్నారు. ‘‘ విషయాన్ని పంచాయతీ కార్యదర్శి సంజప్ప దృష్టికి తీసుకువెళ్లగా.. ప్రభుత్వ కార్యాలయాల్లో ఎలాంటి రాజకీయ పార్టీ కార్యక్రమాలను నిర్వహించరాదని చెప్పారు. సెలవు రోజున సచివాలయ తాళాలు వైకాపా నాయకులకు ఎలా చేరాయో తెలియదన్నారు.