నూర్‌బాషా కార్పొరేషన్‌కు ఏటా రూ.100 కోట్లు

నంద్యాల పట్టణం, న్యూస్‌టుడే : తెదేపా అధికారంలోకి వచ్చిన వెంటనే నూర్‌బాషా కార్పొరేషన్‌ ఏట్పాటు చేసి ఏటా రూ.100 కోట్లు కేటాయిస్తామని నంద్యాల తెదేపా ఎంపీ, ఎమ్మెల్యే అభ్యర్థులు డా.బైరెడ్డి శబరి, ఎన్‌ఎండీ ఫరూక్‌ హామీ ఇచ్చారు. దూదేకుల కులస్థుల ఆర్థికాభివృద్ధికి రాయితీ రుణాలను అందజేస్తామని చెప్పారు. నంద్యాల పట్టణంలో దూదేకుల ఫెడరేషన్‌ మాజీ ఛైర్మన్‌ డా.బాబన్‌ ఆధ్వర్యంలో మంగళవారం నూర్‌బాషా, దూదేకుల వర్గీయులతో ఆత్మీయ సమావేశం నిర్వహించారు. మాజీ మంత్రి ఏరాసు ప్రతాపరెడ్డి, మాజీ ఎమ్మెల్యేలు బైరెడ్డి రాజశేఖరరెడ్డి, భూమా బ్రహ్మానందరెడ్డి, తెదేపా రాష్ట్ర కార్యదర్శి తులసిరెడ్డి, కౌన్సిలర్‌ జైనాబి, వాసవి పాఠశాల కరస్పాండెంట్‌ దస్తగిరి, రవికృష్ణ తదితరులు పాల్గొన్నారు. ఈ సందర్భంగా వారు మాట్లాడుతూ వైకాపా ప్రభుత్వం నూర్‌బాషాల అభివృద్ధికి చేసిందేమీ లేదన్నారు. ఎన్నికల్లో తమను గెలిపించాలని కోరారు. దూదేకుల సంఘం నాయకులు షేక్షావలి, డి.హుసేనప్ప, ఆదాం సాహెబ్‌, డీజీ దస్తగిరి, హుస్సేన్‌బాషా తదితరులు పాల్గొన్నారు.