‘రైతుల సంక్షేమాన్ని విస్మరించిన కాంగ్రెస్‌’

మాట్లాడుతున్న ఎంపీ రాములు

కందనూలు, న్యూస్‌టుడే : రాష్ట్రంలో అధికారం చేపట్టిన కాంగ్రెస్‌ రైతుల సంక్షేమాన్ని పూర్తిగా విస్మరించిందని ఎంపీ రాములు విమర్శించారు. సోమవారం పట్టణంలోని ఓ ప్రైవేట్‌ ఫంక్షన్‌ హాల్‌లో కిసాన్‌ మోర్చా ఆధ్వర్యంలో పార్లమెంట్‌ స్థాయి రైతు సమ్మేళనం నిర్వహించారు. ఎంపీ పాల్గొని మాట్లాడారు. కేంద్రంలో అధికారం చేపట్టిన ప్రధాని మోదీ పదేళ్లుగా రైతుల సంక్షేమానికి వివిధ పథకాలు అమలు చేసినట్లు తెలిపారు. ప్రస్తుత వేసవికాలంలో ప్రాజెక్టులో సాగునీరు లేక రైతుల పంటలు ఎండిపోతున్నా రాష్ట్ర ప్రభుత్వం ప్రత్యామ్నాయ చర్యలు చేపట్టకపోవడం సరైన విధానం కాదని పేర్కొన్నారు. కిసాన్‌ మోర్చా రాష్ట్ర ప్రధాన కార్యదర్శి అంజయ్య, రాష్ట్ర అధికార ప్రతినిధి శేఖర్‌గౌడ్‌, జిల్లా అధ్యక్షుడు రమణారెడ్డి, వెంకట్‌రెడ్డి పాల్గొన్నారు.