ఇంధన ధరలు తగ్గించే వరకు నిరసనలు

నిజామాబాద్‌ అర్బన్‌, న్యూస్‌టుడే: రాష్ట్ర ప్రభుత్వం ఇంధన ధరలు తగ్గించే వరకు జిల్లా వ్యాప్తంగా రోజు నిరసన కార్యక్రమాలు నిర్వహిస్తామని భాజపా జిల్లా అధ్యక్షుడు బస్వా లక్ష్మీనర్సయ్య అన్నారు. శనివారం జిల్లా కేంద్రంలోని గాంధీచౌక్‌ వద్ద ధర్నా చేశారు. ఆయన మాట్లాడుతూ.. కేంద్రం నిర్ణయం మేరకు 22 రాష్ట్రాల్లో సీఎంలు స్పందించి ధరలు తగ్గించారని గుర్తుచేశారు. రాష్ట్ర ప్రభుత్వం మాత్రం నోరు మెదపడం లేదన్నారు. రాష్ట్ర కార్యవర్గ సభ్యుడు ధన్‌పాల్‌ సూర్యనారాయణ గుప్తా, ఓబీసీ మోర్చా రాష్ట్ర అధికార ప్రతినిధి స్వామియాదవ్‌, నాయకులు పోతన్‌కర్‌ లక్ష్మీనారాయణ, గంగాధర్‌, రమాకాంత్‌, కిశోర్‌, అరుణ, జ్యోతి పాల్గొన్నారు.

యువమోర్చాను బలోపేతం చేయాలి

నిజామాబాద్‌ అర్బన్‌: జిల్లాలో యువమోర్చాను సంస్థాగతంగా మరింత బలోపేతం చేయాలని భాజపా జిల్లా అధ్యక్షుడు బస్వా లక్ష్మీనర్సయ్య అన్నారు. శనివారం పార్టీ కార్యాలయంలో బీజేవైఎం జిల్లా అధ్యక్షుడు రాజశేఖర్‌ రెడ్డి ఆధ్వర్యంలో విస్తృతస్థాయి సమావేశం నిర్వహించారు. లక్ష్మీనర్సయ్య మాట్లాడుతూ.. ‘వన్‌ యూత్‌ టెన్‌ బూత్‌’ నినాదంతో ప్రతి పోలింగ్‌ బూత్‌కు పది మంది యువకులతో కమిటీ వేయాలన్నారు. ప్రజాసమస్యలు పరిష్కరించే వరకు ధర్నాలు, నిరసనలు చేపట్టాలని ఆదేశించారు. రాజు, బీజేవైఎం రాష్ట్ర కార్యదర్శి మహేందర్‌, సుధీర్‌, బాలు, విజయ్‌కృష్ణ పాల్గొన్నారు.