దక్షిణ ప్రాంగణంలో రిజిస్ట్రార్‌ తనిఖీ

భిక్కనూరు, న్యూస్‌టుడే: తెవివి దక్షిణ ప్రాంగణాన్ని బుధవారం రిజిస్ట్రార్‌ శివశంకర్‌ తనిఖీ చేశారు. ప్రాంగణంలోని అన్ని విభాగాలు, తరగతులను పరిశీలించి సదుపాయాలు, సమస్యలపై ఆరా తీశారు. సోషల్‌ వర్క్‌ విభాగాధిపతి, బీవోఎస్‌ గదులకు తాళాలు వేసి ఉండడంతో ఆగ్రహం వ్యక్తం చేశారు. విధుల పట్ల నిర్లక్ష్యంవహిస్తే శాఖాపరమైన చర్యలు తీసుకుంటామన్నారు. వచ్చే సెమిస్టర్‌ తరగతులు మొదలయ్యే వరకు విద్యార్థులకు ఎలాంటి సమస్యలు లేకుండా అన్ని వసతులు కల్పించాలని సూచించారు. అనంతరం బాలుర వసతిగృహాన్ని పరిశీలించి భోజనశాలలో విద్యార్థులను కలిసి మాట్లాడారు. నూతనంగా ఏర్పాటు చేసిన క్రీడా ప్రాంగణాన్ని సద్వినియోగం చేసుకోవాలన్నారు. ప్రిన్సిపల్‌ లావణ్య, ఏపీఆర్‌వో యాలాద్రి, అధ్యాపకులు నారాయణ, నిరంజన్, నర్సయ్య, సరిత, దిలీప్‌ ఉన్నారు.