ద్విచక్రవాహనాల దొంగ అరెస్టు

  స్వాధీనం చేసుకున్న వాహనాలతో ఏఎస్సై షకీల్‌ అహ్మద్‌

నిజామాబాద్‌ నేరవిభాగం, న్యూస్‌టుడే : ట్రాక్టర్‌ నడుపుకొంటూ జీవనం సాగించే వ్యక్తి అక్రమంగా డబ్బులు సంపాదించాలనే దురాశతో ద్విచక్ర వాహనాలను దొంగతనాలు చేసి తనిఖీల్లో ఒకటో ఠాణా పోలీసులకు దొరికిపోయాడు. పోలీసుల కథనం ప్రకారం.. గాంధీచౌక్‌లో గురువారం తనిఖీలు నిర్వహిస్తుండగా ఆనంద్‌నగర్‌కు చెందిన సూదం మాదవ్‌(23) అనుమానాస్పదంగా కనిపించాడు. పట్టుకుని విచారించగా ఖలీల్‌వాడిలో ప్రభుత్వ ఆసుపత్రి ఎదుట నిలిపి ఉంచిన మూడు ద్విచక్రవాహనాలను దొంగిలించినట్లు అంగీకరించాడు. నిందితుడి నుంచి వాటిని స్వాధీనం చేసుకొని రిమాండుకు తరలించామని ఎస్‌హెచ్‌వో విజయ్‌బాబు తెలిపారు. ఏఎస్సై షకీల్‌ అహ్మద్‌ కృషితోనే నిందితుడిని త్వరగా పట్టుకున్నామన్నారు.