దడ పుట్టిస్తున్న వడగాలులు

కామారెడ్డి వ్యవసాయం, న్యూస్‌టుడే: జిల్లాలో మంగళవారం ఎండ మండిపోయింది. భానుడు తన ప్రతాపాన్ని రోజురోజుకూ పెంచుతుండడంతో వడగాలులు దడ పుట్టిస్తున్నాయి. మంగళవారం అత్యధికంగా బిచ్కుందలో 44.3 డిగ్రీల ఉష్ణోగ్రత నమోదవ్వగా అత్యల్పంగా పగటి పూట కామారెడ్డి జిల్లాకేంద్రంలలోని కలెక్టరేట్‌, సదాశివనగర్‌ మండలకేంద్రంలో 40 డిగ్రీల ఎండ కాచింది. జిల్లా అంతటా 40 డిగ్రీలకు పైనే ఉష్ణోగ్రతలు నమోదవడంతో ప్రజలు ఉక్కపోతతో ఉక్కిరిబిక్కిరయ్యారు. ఉష్ణోగ్రతలు మరింత పెరిగే అవకాశముందని వాతావరణ శాఖ అధికారులు చెబుతుండడంతో.. ప్రజలు ఎండకు బయటకు వెళ్లకుండా జాగ్రత్తలు తీసుకొని ఆరోగ్యాన్ని కాపాడుకోవాలని వైద్యులు సూచిస్తున్నారు.