ముందస్తు పన్ను రాయితీపై ఆసక్తి

 రాష్ట్రస్థాయిలో ఆర్మూర్‌ 11వ స్థానం

న్యూస్‌టుడే, ఆర్మూర్‌ పట్టణం: ఈ ఆర్థిక సంవత్సరం ఆస్తిపన్నుల వసూలులో ఆర్మూర్‌ బల్దియా ముందంజలో ఉంది. ఈనెల 1 నుంచి 30 వరకు రాష్ట్ర ప్రభుత్వం కల్పించిన పన్ను రుసుముపై 5 శాతం రాయితీ ఇస్తున్న విషయం తెలిసిందే. ఆర్మూర్‌ పురపాలిక రాష్ట్రస్థాయిలో 11వ స్థానంలో ఉంది. గడిచిన 18 రోజుల్లో ఈ లక్ష్యాన్ని అందుకొంది. ఉమ్మడి నిజామాబాద్‌ జిల్లాలోని పురపాలికల్లో ఆర్మూర్‌ ముందు ఉంది. ఉన్నతాధికారుల పర్యవేక్షణ, రాయితీపై పట్టణంలో విస్తృతంగా అవగాహన కల్పిస్తున్నారు. 2023-24 ఆర్థిక సంవత్సరంలో 81.86 శాతం వసూలు చేశారు. 2024-25 ఆర్థిక సంవత్సరంలో రూ.5.68 కోట్ల డిమాండ్‌ ఉండగా ఈనెల 1 నుంచి చేపట్టిన ప్రత్యేక డ్రైవ్‌లో ఇప్పటికే 13.56 శాతం వసూలు చేశారు.

సిబ్బంది సహకారంతోనే.. రాజు, పుర కమిషనర్‌, ఆర్మూర్‌

ఆస్తి పన్ను వసూలులో రాష్ట్రంలోనే ఆర్మూర్‌ బల్దియాకు 11వ స్థానం వచ్చింది. 5 శాతం రాయితీపై విస్తృతంగా ప్రచారం చేస్తున్నాం. బిల్‌ కలెక్టర్లు సైతం నిర్దేశించిన లక్ష్యం కోసం ఎక్కువ గంటలు పనిచేస్తున్నారు. సిబ్బంది సహకారంతోనే ఇది సాధ్యమైంది. మిగిలిన  11 రోజుల్లో మరింత ఎక్కువగా వసూలు చేసి, రాష్ట్రంలో మొదటి     5 స్థానాల్లో ఉండేందుకు కృషి చేస్తాం.