వర్ష బీభత్సం

సువాయి వద్ద నెలకొరిగిన భారీ వృక్షం

సిమిలిగుడ, న్యూస్‌టుడే: కొరాపుట్‌ జిల్లాలో సోమవారం మధ్యాహ్నం పెనుగాలులతో కూడిన భారీ వర్షం తీవ్ర నష్టాల్ని మిగిల్చింది. ఉదయం నుంచి ఎండ తీవ్రతతో వేడి భరించలేక ప్రజలు విలవిల్లాడారు. మధ్యాహ్నం రెండు గంటలకు ఈదురు గాలులతో కూడిన వర్షం కురిసింది. పెనుగాలులకు జిల్లాలోని నారాయణ ప్రాంతంలో అరటి చెట్లు విరిగిపడ్డాయి. సుమారు రూ.3 లక్షలు నష్టపోయినట్లు రైతు గోవింద రాజు తెలిపారు. సిమిలిగుడ సమితి సువాయి వద్ద రోడ్డుకు అడ్డంగా భారీ వృక్షం నేలకొరగడంతో రాకపోకలు నిలిచిపోయాయి. అక్కడ కన్య ఆశ్రమం ప్రవేశ ద్వారం గాలికి  పడిపోయింది. రెంగా పంచాయతీ మరువలో ఒక ఇంటి పైకప్పు ఎగిరిపోయింది. అక్కడ ఉన్న కారుపై పైకప్పు రేకులు పడడంతో వాహనం ధ్వంసమైంది. నందపూర్‌ సమితి కీముడు గూడలో ట్రాన్స్‌ఫార్మర్‌ నేలకొరిగింది. విద్యుత్తు తీగలు తెగిపడడంతో  అంధకారం అలముకుంది.  రెంగాలో 4, దుసురలో రెండు, విద్యుత్‌ స్తంభాలు కూలాయి. వర్షం ప్రభావంతో విద్యుత్తు సరఫరాకు అంతరాయం కలిగింది.