భూకమతాల గణనపై అవగాహన అవసరం

బలిజిపేట: ప్రతి ఐదేళ్లకోసారి నిర్వహించే 11వ సాగుదారుల భూకమతాల గణనపై ప్రతి ఒక్కరికి అవగాహన అవసరమని పార్వతీపురం డివిజన్‌ ఉపగణాంక అధికారి జయప్రకాశ్‌ అన్నారు. బలిజిపేట తహసీల్దార్‌ కార్యాలయంలో వీఆర్వోలకు సోమవారం ఒక్కరోజు శిక్షణా కార్యక్రమం నిర్వహించారు. మొదటి దశలో సాగు కమతాల గణన, రెండో దశలో పంటల వివరాలు, నీటివనరులు, మూడో దశలో యంత్ర పరికరాలు, పనిముట్ల ఉపయోగంపై సర్వే నిర్వహించాలన్నారు. భారత వ్యవసాయ రైతు సంక్షేమ శాఖ ఆధ్వర్యంలో కార్మిక, సామాజిక, సంక్షేమ పథకాల అమలుకు ఈ సర్వే చేపడుతున్నట్లు తెలిపారు. డిసెంబర్‌ 31లోగా వీఆర్వోలు మొబైల్‌ యాప్‌ ద్వారా ఈ ప్రక్రియ చేపట్టాలని సూచించారు. కార్యక్రమంలో తహసీల్దార్‌ వీవీఎస్‌ శర్మ, బలిజిపేట గణాంక అధికారి విజయరావు తదితరులు పాల్గొన్నారు.