వైకాపాకు ఓటుతో బుద్ధి చెప్పాలి

మాట్లాడుతున్న ఎంపీ అభ్యర్థిని గీత, చిత్రంలో ఎమ్మెల్యే అభ్యర్థిని జగదీశ్వరి

కొమరాడ, న్యూస్‌టుడే: వైకాపా అరాచక పాలనకు ప్రజలే ఓటుతో బుద్ధి చెప్పాలని కూటమి అరకు పార్లమెంటరీ నియోజకవర్గ అభ్యర్థిని కొత్తపల్లి గీత, కురుపాం నియోజకవర్గ ఎమ్మెల్యే అభ్యర్థిని తోయక జగదీశ్వరి పిలుపునిచ్చారు. శుక్రవారం కొమరాడలో ఎన్నికల ప్రచారం నిర్వహించారు. ఈ సందర్భంగా వారు మాట్లాడారు. సూపర్‌ 6 పథకాల గురించి తెలియజేశారు. వైకాపా ప్రభుత్వంలో ప్రచారాలు తప్ప పనులు జరగలేదని ఎద్దేవా చేశారు. పూర్ణపాడు- లాబేసు వంతెన నిర్మాణం, ఏనుగులతో సమస్యలు ఈ ప్రభుత్వానికి కనిపించలేదా అని ప్రశ్నించారు. కొన్ని వేల ఎకరాల్లో పంటలు దెబ్బతిన్నా పట్టించుకోలేదని మండిపడ్డారు. కూటమి అధికారంలోకి రాగానే నియోజకవర్గంలోని సమస్యలను పరిష్కరిస్తామని హామీ ఇచ్చారు. మాజీ ఎమ్మెల్సీ డి.జగదీశ్‌, తెదేపా రాష్ట్ర కార్యదర్శి వీరేశ్‌ చంద్రదేవ్‌, డి.లక్ష్మణరావు, మండల కన్వీనరు శేఖర్‌పాత్రుడు, నాయకులు పాల్గొన్నారు.