ప్రశాంత ఎన్నికలే లక్ష్యం

మాట్లాడుతున్న పరిశీలకుడు దీపక్‌మిశ్రా

పార్వతీపురం, న్యూస్‌టుడే: రాష్ట్రంలో ఎన్నికలను సజావుగా నిర్వహించడమే లక్ష్యంగా యంత్రాంగం పనిచేయాలని రాష్ట్ర పోలీసు పరిశీలకుడు దీపక్‌మిశ్రా అన్నారు. శుక్రవారం ఆయన జిల్లాలో పర్యటించారు. కలెక్టరేట్‌లో అధికారులతో సమావేశమై దిశానిర్దేశం చేశారు. స్వేచ్ఛగా, ప్రశాంతంగా పూర్తి చేయడం దృష్టిసారించాలన్నారు. చిన్న తప్పు జరిగినా ఉద్యోగ జీవితంలో తీవ్ర ఇబ్బందులు ఎదురవుతాయని హెచ్చరించారు. ఎలాంటి అపోహలు, అనుమానాలకు తావివ్వకుండా పని చేయాలని కోరారు. జిల్లాలో చేస్తున్న ఏర్పాట్లను కలెక్టర్‌ నిశాంత్‌కుమార్‌ వివరించారు. ఉద్యాన కళాశాలలో లెక్కింపు కేంద్రం ఏర్పాటు చేశామన్నారు. పోలీసుశాఖ పరంగా తీసుకున్న చర్యలను ఎస్పీ విక్రాంత్‌పాటిల్‌ తెలియజేశారు. రాష్ట్ర అదనపు డీజీపీ శంఖ బ్రత బాగ్చి, పార్లమెంటరీ నియోజకవర్గ సాధారణ, పోలీసు పరిశీలకులు ప్రమోద్‌ కుమార్‌ మెహర్ద, నయీం ముస్తఫా మన్సూరీ, విశాఖ రేంజ్‌ డీఐజీ విశాల్‌ గున్ని, జేసీ శోభిక, అదనపు ఎస్పీ దిలీప్‌కిరణ్‌, ఏఎస్పీ సునీల్‌ షరోన్‌ తదితరులు పాల్గొన్నారు.