యువతను మత్తు బారిన పడనీయొద్దు

పోలీసు సిబ్బందితో ప్రతిజ్ఞ చేయిస్తున్న జిల్లా అదనపు ఎస్పీ(అడ్మిన్‌) నాగేశ్వరరావు

ఒంగోలు నేరవిభాగం, న్యూస్‌టుడే: మత్తు పదార్థాలకు బానిసలైతే జీవితాలు సర్వనాశనమవుతాయనీ.. ముఖ్యంగా యువత, విద్యార్థులు వీటి బారిన పడకుండా కాపాడుకోవాల్సిన బాధ్యత ప్రతి ఒక్కరిపై ఉందని జిల్లా అదనపు ఎస్పీ(అడ్మిన్‌) కె.నాగేశ్వరరావు అన్నారు. అంతర్జాతీయ మాదక ద్రవ్యాల వ్యతిరేక దినోత్సవాన్ని ఒంగోలులోని జిల్లా పోలీసు కార్యాలయంలో ఆదివారం నిర్వహించారు. తొలుత మాదక ద్రవ్యాలకు వ్యతిరేకంగా అధికారులు, సిబ్బందితో ప్రతిజ్ఞ చేయించారు. అనంతరం అదనపు ఎస్పీ మాట్లాడుతూ.. మాదక ద్రవ్యాలకు బానిసలైన కొందరు యువకులు తమ జీవితాలను నాశనం చేసుకుంటున్నారని అన్నారు. వీటి వాడకంతో ఆలోచన మందగించి, విచక్షణా శక్తి నశించి నేరాలకు పాల్పడుతున్నారని తెలిపారు. డబ్బు సంపాదించాలనే దురాశతో యువతను వ్యసనాలకు బానిసలుగా మారుస్తున్న వారిని పోలీసు శాఖ ఉపేక్షించబోదనీ, కఠినంగా వ్యవహరిస్తుందని హెచ్చరించారు. కార్యక్రమంలో ఎస్‌బీ డీఎస్పీ బి.మరియదాసు, ఏఆర్‌ డీఎస్పీ రాఘవేంద్ర, ఆర్‌ఐ శ్రీహరిరావు తదితరులు పాల్గొన్నారు.